മൊബൈല് വൈറസ് ഉപയോഗിച്ച് പണംതട്ടിപ്പ് ഏറുന്നു - റിപ്പോര്ട്ട്
നിങ്ങളുടെ മൊബൈല് നിങ്ങളറിയാതെ ഏതെങ്കിലും വെബ്സൈറ്റ് സന്ദര്ശിക്കുകയും, ആ വെബ്സൈറ്റിലെ പരസ്യത്തിന്റെ റേറ്റ് വര്ധിപ്പിച്ച് മറ്റാര്ക്കോ പണമുണ്ടാക്കാന് കൂട്ടുനില്ക്കുകയും ചെയ്താല് എങ്ങനെയിരിക്കും. നിങ്ങളാകും വിവരമറിയുക, ഫോണ്ബില്ല് വരുമ്പോള്. മൊബൈലുപയോഗിച്ചുള്ള പണംതട്ടിപ്പ് തന്നെയാണത്.
അതെ മൊബൈല് വൈറസുകളുടെ സഹായത്തോടെ നടത്തുന്ന ഇത്തരം തട്ടിപ്പ് വര്ധിച്ചു വരികയാണെന്ന് റിപ്പോര്ട്ട്. കഴിഞ്ഞ ഒന്പത് മാസത്തിനിടെ മൊബൈല് ദുഷ്ടപ്രോഗ്രാമുകളില് പണംതട്ടാനുപയോഗിക്കുന്ന വൈറസുകളുടെ തോത് 29 ല് നിന്ന് 62 ശതമാനമായി വര്ധിച്ചുവത്രേ.
'ലുക്കൗട്ട്' എന്ന മൊബൈല് സുരക്ഷാകമ്പനിയാണ്, മൊബൈല് വൈറസുകളെ പണംതട്ടാന് ഉപയോഗിക്കുന്ന പ്രവര്ത്തനം വര്ധിച്ചതായി കണ്ടെത്തിയത്. മൊബൈല് ആപ്ലിക്കേഷനുകളിലും (ആപ്സുകളിലും) മൊബൈല് പരസ്യങ്ങളിലും ഒളിപ്പിച്ചുവെച്ച വൈറസുകളാണ്, മൊബൈല് ഉടമകള്ക്ക് സാമ്പത്തികനഷ്ടം ഉണ്ടാക്കുന്നതത്രേ.
പണമുണ്ടാക്കാന് വിവിധ മാര്ഗങ്ങള് പരീക്ഷിക്കുന്നതിന് പകരം മൊബൈല് തട്ടിപ്പുകാര് വൈറസുകളിലേക്ക് തിരിയുന്നതിന്റെ സൂചനയാണ് ഇപ്പോള് കാണുന്നതെന്ന്, ലുക്കൗട്ട് ടെക്നോളജി മേധാവി കെവിന് മഹാഫിയി പറയുന്നു. കഴിഞ്ഞ കുറെ മാസങ്ങള്ക്കിടെയുണ്ടായ പണംതട്ടുന്ന മൊബൈല് വൈറസുകളുടെ പെരുപ്പം അതാണ് സൂചിപ്പിക്കുന്നത്.
തട്ടിപ്പ് ആവര്ത്തിക്കാമെന്ന് ഒരിക്കല് കണ്ടാല്, പിന്നെ ആ വഴിക്ക് വാന്തോതില് നീങ്ങുകയെന്നത് സൈബര് തട്ടിപ്പുകാരുടെ രീതിയാണെന്ന് മഹാഫിയി ചൂണ്ടിക്കാട്ടി.
മൊബൈല് വൈറസുകള് കൂടുതല് പടര്ന്നിരിക്കുന്നത് റഷ്യയിലാണെന്ന് ലുക്കൗട്ടിന്റെ പഠനം പറയുന്നു. ചൈനയിലും ഇന്ത്യയിലും വൈറസ് വേഗത്തില് പടരുന്നതായുംറിപ്പോര്ട്ട് മുന്നറിയിപ്പ് നല്കുന്നു.
പണംതട്ടാന് സഹായിക്കുന്ന മൊബൈല് വൈറസ് സൃഷ്ടിക്കുന്നത് ചെറിയ എണ്ണം കുബുദ്ധികളാണെന്ന് ലുക്കൗട്ടിന്റെ വിശകലനത്തില് കണ്ടു. തങ്ങളുടെ ദുഷ്ചെയ്തികള് മറ്റുള്ളവരുടെ കണ്ണില്നിന്ന് മറച്ചുവെയ്ക്കാന് സൈബര് ക്രിമിനലുകള് ആദ്യം'NotCompatible' എന്ന പേരിലുള്ള വൈറസിനെ ഒരു ഫോണിലേക്ക് കടത്തിവിടുകയാണ് ചെയ്യുകയെന്ന് ലുക്കൗട്ട് പറയുന്നു.
അങ്ങനെ വൈറസ് ബാധിച്ച ഫോണാകും ടാര്ജറ്റ് വെബ്സൈറ്റിലേക്ക് ട്രാഫിക് നിയന്ത്രിക്കാന് ഉപയോഗിക്കുക. അതിനാല്, വൈറസിന്റെ യഥാര്ഥ സ്രോതസ്സ് കണ്ടുപിടിക്കുക ബുദ്ധിമുട്ടാകും.
തട്ടിപ്പുകാര്ക്ക് പണമുണ്ടാക്കാന് പാകത്തില്, ഒരു വെബ്സൈറ്റിലെ പരസ്യത്തിന്റെയോ, മ്യൂസിക് വെബ്സൈറ്റിലെ ഏതെങ്കിലും പ്രത്യേക പാട്ടിന്റെയോ ജനപ്രിയത കൃത്രിമമായുയര്ത്താന് മൊബൈല് വൈറസിന്റെ സഹായം തേടുകയാണ് ചെയ്യുന്നത്.
വൈറസ് ബാധിത ഫോണുകളില് നിന്ന് അതിനാവശ്യമായ ട്രാഫിക് ഉണ്ടാകും. അത് മൊബൈല് ബില്ലില് പ്രതിഫലിക്കും. നഷ്ടം മൊബൈല് ഉപയോഗിക്കുന്നയാളുടെ കീശ കാലിയാകുമ്പോള്, തട്ടിപ്പുകാര്ക്ക് അത് കൊയ്ത്താകുന്നു.
ഏതാണ്ട് 200 ലക്ഷം മൊബൈല് ഉപയോക്താക്കളുടെ പക്കല്നിന്നും മൊബൈല് വ്യവസായ മേഖലയിലെ വിശകലന വിദഗ്ധരില് നിന്നും ശേഖരിച്ച വിവരങ്ങളാണ് ലുക്കൗട്ട് പഠനത്തിനുപയോഗിച്ചത്.
No comments:
Post a Comment